पाच महिने आंदोलन करूनही न्याय मिळाला नाही ..
सेवानिवृत्तीचा कार्यक्रम सुध्दा संचालक कार्यालयासमोर
कार्यालय बाहेरच सेवानिवृत्तीचा कार्यक्रम शिक्षण संचालक शिक्षकाला न्याय कधी देणार
पुणे:पूर्णवेळ वेतननिश्चिती करावी, पूर्णवेळ वेतन मिळावे, तसेच सेवानिवृत्ती वेतन मिळावे, या मागणीसाठी व न्याय हक्कासाठी १५ मे २०२५ पासून प्राध्यापक दिलीप ठोंबे हे पुण्यातील राज्याच्या उच्च शिक्षण संचालक कार्यालयासमोर कुटुंबासह धरणे आंदोलन व उपोषण करत आहेत. आज ते सेवानिवृत्त होत आहेत. सेवानिवृत्तीच्या दिवशीही त्यांनी आंदोलन सुरू ठेवले आहे.तसेच सेवानिवृत्तीचा कार्यक्रम सुध्दा संचालक कार्यालयासमोर प्राध्यापक संघटनेने केला.
प्राध्यापक ठोंबे हे अहिल्यानगर जिल्ह्यातील बोधेगाव तालुक्यातील शेवगाव येथील आबासाहेब काकडे कला महाविद्यालय प्राध्यापक पदावर सन- १९९९ पासून कार्यरत आहेत. शासन निर्णयानुसार नियुक्ती पासून त्यांचा पूर्णवेळ कार्यभार आहे. पूर्णवेळ कायमस्वरूपी विद्यापीठ मान्यता असून पुणे विभागीय उच्च शिक्षण सहसंचालक, कार्यालयाने त्यांना सन -२००६ व २०११ मध्ये अनुदान निर्धारण अहवालात पूर्णवेळ मान्यता दिलेली आहे. तसेच उच्च न्यायालयाने त्यांच्या बाजूने आदेश दिलेला आहे . तसेच २९ जानेवारी २०२५ रोजी मुंबई येथे उच्च शिक्षणमंत्री चंद्रकांत पाटील यांच्या बरोबर झालेल्या बैठकीत पाटील यांनी या केस मध्ये हायकोर्टाचा आदेश आहे तर सद्सद्विवेक बुद्धीने निर्णय घेतला पाहिजे. त्याचप्रमाणे ही केस समजून घेऊन लक्ष घालून ८ दिवसात यावर सकारात्मक कार्यवाही करावी, असे आदेश उच्च शिक्षण विभागाला दिले होते. मात्र,उच्च शिक्षण विभागातील अधिकाऱ्यांनी अजूनही हा प्रश्न प्रलंबित ठेवलेला आहे.विभागीय सहसंचालक कार्यालयाने उच्च न्यायालयाच्या आदेशानुसार व त्यांच्याच महाविद्यालयातील प्रा. बाळासाहेब बनसोडे यांच्याप्रमाणे समान न्याय तत्त्वानुसार सदसदविवेक बुद्धीने तात्काळ निर्णय घ्यावा,अशी अपेक्षित ठोंबे यांनी व्यक्त केली आहे.दिलीप ठोंबे यांचा सेवानिवृत्ती कार्यक्रम आंदोलन करत सरकारचा निषेध व्यक्त करण्यात आला. यावेळी प्राध्यापक दिलीप ठोंबे भाऊक झाले.आम्हाला न्याय मिळणार माणूस गेल्यानंतर भेटणार आहे का आणि जेव्हा ते पैसे भेटतील त्याचा उपयोग आम्हाला काय असा सवाल प्राध्यापक ठोंबे यांच्या पत्नीने सरकारला विचारला आहे. जोपर्यंत न्याय मिळणार नाही तोपर्यंत या ठिकाणाहून उठणार नाही.
