पुणे : सर्वसामान्य नागरिकांच्या शासकीय कामांना गती मिळावी तसेच विविध शासकीय सेवा व योजनांचा लाभ नागरिकांना एकाच ठिकाणी सहज उपलब्ध व्हावा या उद्देशाने आयोजित करण्यात आलेले छत्रपती शिवाजी महाराज महाराज्य समाधान शिबिर मोठ्या उत्साहात आणि नागरिकांच्या उत्स्फूर्त प्रतिसादात यशस्वीरित्या पार पडले. या शिबिरात नागरिकांनी मोठ्या संख्येने उपस्थित राहून विविध सेवांचा लाभ घेतला.
शिबिरामध्ये फेरफार नोंदी, उत्पन्न दाखले, जात प्रमाणपत्र, आधार कार्ड दुरुस्ती, मतदान नोंदणी, आरोग्य तपासणी व सेवा, शासकीय योजनांबाबत मार्गदर्शन, बँक खाते उघडणे, DBT सेवा, रेशन कार्ड संबंधित कामे, पाणीपुरवठा विषयक तक्रारी तसेच इतर विविध शासकीय सेवांसाठी विशेष व्यवस्था करण्यात आली होती. विविध विभागातील अधिकारी व कर्मचाऱ्यांनी नागरिकांच्या समस्या तत्काळ सोडवण्यासाठी सकारात्मक सहभाग नोंदवत आवश्यक मार्गदर्शन केले.
या शिबिराला लोकप्रिय आमदार सिद्धार्थ शिरोळे यांची विशेष उपस्थिती व मार्गदर्शन लाभले. तसेच नगरसेवक रविंद्र सळेगावकर, नगरसेविका पूजा जागडे, नगरसेविका अमृता म्हेत्रे, सतीश बहिरट, शैलेश बडदे, योगेश बाचल, गणेश बगाडे, सुरेश शिंदे, विकास डाबी आणि सोमनाथ भोसले यांची मान्यवर उपस्थिती होती.
नागरिकांनी शिबिराला दिलेल्या उत्स्फूर्त प्रतिसादामुळे कार्यक्रमाला विशेष यश मिळाले. विविध सेवा एकाच छताखाली उपलब्ध झाल्यामुळे नागरिकांनी समाधान व्यक्त केले. सदर कार्यक्रमाचे आयोजन स्थायी समिती सदस्य तथा पुणे महानगरपालिका नगरसेविका निशा सचिन मानवतकर आणि सचिन मानवतकर यांनी केले होते. या उपक्रमामुळे नागरिकांना शासकीय सेवांचा लाभ अधिक सुलभ पद्धतीने मिळाल्याने परिसरात समाधानाचे वातावरण निर्माण झाले.
